CEBU, Philippines - Gihangop sa mokabat sa 2,000 ka mga magtutudlo sa publikong tulunghaan sa elementarya ug sekondarya nga naglakip na sa mga non-teaching personnel ang suporta gikan sa mayor nga pausbawan ang ilang Coast of Living Allowance (COLA).
Una nang gisupak sa mayoriya sa konseho sa dakbayan sa Mandaue ang resolusyon nga giduso ni Konsehal Lollypop Ouano-Dizon nga padungagan ang P700 nila nga COLA og P300.
Apan atol sa pagsaulog sa World Teachers Day celebration ning semanaha, si Mayor Jonas Cortes namahayag nga iyang suportahan ang maong resolusyon.
“We are also very sensitive to the needs of our teachers and have extended all the assistance that we can. No doubt there is a need to increase the COLA of teachers but it should go through the standard procedures,” dugang pa niya.
Tulo na ka higayon nga gisuportahan ni Cortes ang pagpausbaw sa COLA sa mga magtutudlo sa Mandaue gikan sa P300 ngadto sa P500 ug karon P700. Ning bag-o, iyang suportahan ang dugang P300 aron mahimo na kining P1,000.
“We are very happy for this development and we thank the mayor for this,” pamahayag ni Jerill Galleon, grade 7 adviser sa Mandaue City School for the Arts. Gawas pa niini, gitinguha ni Cortes nga masolusyonan ang kakulang sa mga lawak-saringan.
Ang mga magtutudlo nga sakop sa Dignity Teachers Coalition nga gipangulohan ni Annabel Dela Cerna midangop kang Konsehal Lollypop Ouano-Dizon aron mopalabang og resolusyon nga naghangyo sa pag-usbaw og P500 sa gidawat nilang COLA sa matag bulan.
Apan sa resolusyon ni Ouano, P300 nga usbaw lang ang gipangayo apan bisan pa niini wala kini tugoti sa konseho tungod sa kakulang sa pundo. (BANAT NEWS)