CEBU, Philippines - Ang Comelec dili na motugot nga daghang supporters ang manguyog pagsulod sa ilang buhatan atol sa pagduso og Certificate of Candidacy (COC) sa usa ka politiko aron dili maghuot.
Niining ulahi lang si Comelec chairman Andres Bautista mipahibawo nga tulo lang ka supporters ang gitugotang makakuyog sa matag politiko sa national sa pagduso sa iyang COC.
Gipasabot ni Bautista nga buot nilang mahapsay ang proseso lakip na usab ang pagduso sa COC sa mga mokandidato.
Hinuon matud ni Bautista nga walay mapahamtang nga silot batok sa mga politiko kung makalapas sila niini. Si Comelec provincial officer, Lionel Marco Castillano nagkanayon nga gagmay gyud kaayo ang mga buhatan sa Comelec ug dili pweding mosulod ang tanang supporters.
Hinuon si Castillano miingon nga ang mga election officers na maoy maigo kun unsaon niya sa pagpasabot ang mga supporter ug kandidato sa maong polisiya. Dugang niya nga base sa ilang kasinatian dili man hinuon mosulod ang mga supporter sa buhatan sa Comelec gawas lang sa pamilya sa kandidato. (BANAT NEWS)