CEBU, Philippines - Naputol ang ubol-ubol sa usa ka lalaki human kini gikatahong niunay paggulgol sa iyang kaugalingon sulod sa iyang lawak diha sa sitio Itom Yuta, barangay Lorega San Miguel ning dakbayan sa Sugbo.
Ang naghikog patay mao si Placido Flores Jr., nagpuyo sa maong dapit.
Sumala pa ni Senior Police Officer 2 Ruth Violango, imbestigador sa Homicide Section sa Cebu City Police Office, si Flores taud-taod nang dunay kakulian sa pangisip base sa impormasyong gihatag kanila sa mga kabanay.
Ang pamilya sa namatay mitug-an sa kapulisan nga magyawyaw bisan nag-inusara si Flores ug duna kini gikahadlokan nga tawo nga mopatay kaniya.
Niadtong nakalabay nga buntag nabantayan sa inahan nga wala mogawas sa iyang lawak si Flores apan hapon na lang wa gihapon kini nangabli sa lawak maong ilaha kining gisusi ug napalgan nila nga patay na kini.
Sa pagsubay sa kapolisan aduna kini dakong samad sa liog ug tapad sa lawas ni Flores ang 13 pulgadas nga hait nga kutsilyo.
Si Violango miingon nga wala sila nagduda nga adunay foul play sa kamatayon ni Flores tungod kay nag-inusara lang kini sa lawak. (BANAT NEWS)