CEBU, Philippines – Nakulatahan ug nadakpan sa mga residente sa Barangay Jaclupan, Dakbayan sa Talisay si Jeramil Jordan human kini niunay og kawat sa stereo sa sakyanan sa iya’ng amo sa niagi’ng adlaw.
Ang 30-anyos nga dinakpan niangkon nga paryente sila ni Michael Jordan, ang inila’ng basketbolista sa tibuok kalibutan.
Apan si Jeramil nagtrabaho isip truck boy sa negosyo ni Anabelle Obejero.
Matud sa biktima nga nawagtang og kalit ang ila’ng Pioneer stereo nga mokantidad og P13,000; tulo ka speaker nga mobalor og P4,000 ug igtatari nga manok nga P2,000.
Asoy ni Obejero nga nasuta nga si Jordan ang nangawat human ang gibaligyaan sa speaker kaila ra sa biktima.
Wala maglangay si Obejero sa pag-hold ni Jordan nga mao gyud ang gitumbok sa iya’ng gibaligyaan sa butang.
Ang ubang sakop sa biktima wala gyud nakapugong ug nilabay gyud og mga kinumo.
Si Jordan sa pagpakighinabi sa Banat News niangkon sa salaud tungod sa pagsustiner sa iya’ng bisyo nga ilegal nga drugas.
Gi-turnover si Jordan ngadto sa kapolisan ug gikatakda’ng pasakaan og kaso’ng pagpangawat. – /GMR) (BANAT NEWS)