CEBU, Philippines – Nagtingkagol sa Toledo City Police Station ang usa ka 35-anyos nga lalaki nga gipasanginlang tighimo og peke nga dokumento sa resulta sa drug test diha sa Purok Caimito, barangay Sangi sa dakbayan sa Toledo.
Giila ang dinakpan nga si Melvin Cabatuan, u35, residente sa nahisgutang lugar kinsa gidakop pinaagi sa gihimong entrapment operation sa kapulisan sa Toledo sulod mismo sa panimalay niini. Sila si Senior Police Officer 2 Gerardo Taboada, Police Officer 3 Elbert Dolino, PO2 Leonides Leduna, PO2 Gerald Toquero ug PO1 Ivan Lloyd Carvellida ang nihimo sa entrapment operation. Usa sa mga polis ang nagpakaaron ingnong kustomer ug gustong magpahimo og peke nga resulta sa drugtest. Dihang nagpositibo sa pasangil daling gisikop ang suspek.
Ang operasyon gihimo tungod sa reklamo nga nadawat sa kapulisan gikan sa usa ka Ven Thomas Kuan, 41, taga barangay Cabitoonan nga tagdumala sa West Coast Medical Laboratory nga nahimutang sa Poblacion sa maong siyudad.
Matud pa ni Kuan ngadto sa mga polis, adunay nipeke sa porma sa dokumento sa ilang drug test results ug gigamit kini aron pangwarta.
Nakuha gikan sa panimalay sa suspek ang computer set, printer ug flash drive nga giingong gigamit sa pagbuhat sa mga peke nga dokumento. – /EIM) (BANAT NEWS)