CEBU, Philippines – Gumikan sa nasinating pag-ulan-ulan dinhi sa Sugbo nga moresulta sa pagbaha ug pagdahili sa mga yuta, ang Department of Environment and Natural Resources subling niawhag sa mga barangay opisyal ug local government officials nga motamod kanunay sa ilang Geo Hazard Mapping and Assessment nga gipaguwa tulo ka tuig ang nilabay. Ang tigpamaba sa DENR-7 nga si Eddie Llamedo nga nahinabi sa Banat News miingon nga ilaha karong susihon ang barangay Casili sa dakbayan sa Mandaue diin dunay balay nga natabunan ug nakalas ang usa ka bata ug naangol ang duha.
Sumala pa ni Llamedo, 22 porsiyento sa kayutaan sa Sugbo humok modahili ilabi na ang kabukiran apil niini ang sa Mandaue City.
Giawhag niya ang mga opisyal sa barangay Casili nga ibalhin lang una sa mas luwas nga lugar ang mga residente duol sa lugar nga nidahili niadtong Domingo samtang nagpadayon pa ang uwan-uwan. – /EIM) (BANAT NEWS)