CEBU, Philippines - Walay nahitabong pagpaburot sa presyo sa mga produkto tungod sa pagpahigayon sa Asia-Pacific Economic Cooperation Meet (APEC) matud ni Christian Paroan sa Philippine Retailer Association, Cebu chapter.
Human sa isyu kabahin sa taas kaayong paburot sa mga hotel rate dihang nagdanga-danga pa ang APEC summit nganhi sa Sugbo karon gikabalak-an nga ang mga negosyante mopaburot usab sa presyo sa produkto ilabi na sa mga pasalubong.
Si Paroan nagkanayon nga ang Department of Trade and Industry (DTI) estrikto kaayong nag-monitor sa mga presyo sa tanang produkto sa mga retailers sa nagkalain-laing industriya.
Matud ni Paroan nga hanap ang kabahin sa isyu nga dunay mahitabong paburot sa presyo sa mga produkto tungod kay regulated kini.
Ang pagpahigayon sa APEC nganhi sa Sugbo usa usab ka dakong tabang ngadto sa business sector nga mapauswag ug mailhan ang ilang produkto ngadto sa mga langyaw nga bisita. Matud ni Paroan nga dako ang posibilidad nga ang mga lokal nga produkto mapadala kini ngadto sa export market.
Si Paroan miawhag sa mga retailers sa paghatag og mga freebies o mga pakapin o mopahigayon og mga kalihukan nga makapadani sa mga bisita nga moadto sa ilang mga shops aron maila ang ilang mga produkto.
Dugang ni Paroan nga kinahanglan ang mga shops magbaton og maayong costumer service aron maatiman ang mga reklamo sa mga pumapalit ilabi na niining panahon sa APEC summit. (Brenda D. Batuto/EIM)(BANAT NEWS)