CEBU, Philippines - Giplano karon sa kadagkoan sa trapiko sa dakbayan sa Mandaue ang pagpakigtagbo sa mga drayber sa traysikol ug mga operators niini aron tukion ang pagdugang sa prangkisa sa mga traysikol nga tugotang makapamasahero sa dakbayan.
Si Glenn Antigua, executive officer sa Traffic Enforcement Agency of Mandaue (TEAM) miingon nga base sa giamendahang ordinansa sa siyudad, gikan sa 2,000 ka prangkisa himuon na kining 3,000.
Kini aron matubag ang nasinating kakulang sa mga nagbiyaheng pasaheroan sa mga sudlonong barangay sa dakbayan.
Apan hugot siyang mipahimangno niadtong namasahero nga way prangkisa nga padayonon nila ang pagpanakop niini.
Higpit gihapon ang pagdili sa mga traysikol nga makasud sa mga national roads. (BANAT NEWS)