CEBU, Philippines - Ang Liberal Party (LP) sa probinsiya gikatakdang magpahigayon og general meeting aron matuki ang mga problema sa unang distrito kay hangtud karon wala pa gihapon silay klarong local lineup.
Gikataho nga wala pa mahapsay ang LP sa unang distrito ilabi na diha sa dakbayan sa Talisay tungod kay ang mayor ug bise mayor sa siyudad parehong sakop sa LP gikatakdang mag-atbang sa eleksiyon sa sunod tuig.
Gawas niini si Department of Interior and Local Government (DILG) secretary Mar Roxas mipadayag nga si Kongresista Gerald Anthony “Samsam” Gullas maoy buot niya himuong chairman sa LP sa unang distrito.
Apan ang mga kaalyado sa LP sa distrito nagtuong si Mayor Antonio Canoy sa San Fernando ang himuong chairman. Si Gullas sakop sa Alayon Party nga ka-kowalisyon sa LP.
Ang Alayon mipadayag og suporta kang Roxas ug kang Gob. Hilario Davide, III ug Bise Gobernador Agnes Magpale.
Si Davide nagkanayon nga tukion sa general meeting ang mga problema sa ilang partido ug masolusyonan ang problema sa distrito aron pagsigurong modaog ilang mga kandidato ug si Roxas.
Sa laing bahin, si Bokal Raul “Yayoy” Alcoseba sa unang distrito kinsa kaalyado usab sa LP nasagmuyo tungod sa pagsulod sa Alayon ug nalawgaw karon ang unang distrito.
Matud usab ni Alcoseba, kompleto na ang lineup sa LP sa unang distrito ug ang Alayon mi-coalition lang sila sa LP sa pagsuporta kang Davide, Magpale ug Roxas. (BANAT NEWS)