CEBU, Philippines – Giabagan sa mga barangay tanod sa 27 ka barangay sa dakbayan sa Mandaue ang kapolisan sa paghatag og seguridad sa mga delegado sa APEC Summit nga mosuroy sa nagkalainlaing dapit.
Si Senior Superintendent Mariano Natuel Jr., officer-in-charge sa Mandaue City Police Office, nihangop sa pag-abag sa mga tanod tungod kay ang mga polis adunay lainlaing destino nga gihatag ngadto kanila.
Matud ni Natuel nga ang gimbuhaton sa mga polis dili usab mahimo nga maapektuhan atol sa kalihukan sa APEC hinungdan nga daku kaayo og ikatabang ang mga tanod sa pagdugang sa ila’ng pwersa.
Gitataw ni Natuel nga gawas nga adunay mga polis nga gidestino alang sa road security, ang pipila kanila ang nadestino usab sa pagkuyog sa mga delegado isip mga escorts.
Ang mga sakop sa Investigation Detection and Management Bureau (IDMB) sa MCPO ang gibahin usab sa pagdestino sa mga hotels nga nahimutangan sa mga delegado sa pagseguro sa kaluwasan niini.
Gipaabot usab nga ang mga delegado mosuroy sa mga malls sa dakbayan ug lakip sa mga pabrika sa mga export nga produkto. – /GMR) (BANAT NEWS)