CEBU, Philippines – Patay na nga nakit-an sa iyang bana ang iyang asawa human kini gituohang nagpusil sa iyang ulo gamit ang .38 revolver sulod sa kasilyas didto sa Sitio Kamas, Barangay Maya lungsod sa Daanbantayan pasado alas 5 sa nakalabay nga kaadlawon.
Ang naghikog patay naila nga si Elvie Dublin, 33. Si Police Officer 3 George Banatasa ang desk officer sa Daanbantayan Police nga nahinabi sa Banat News miingon nga base sa gibutyag nga impormasyon sa bana niining si Francisco, dugay na kining naghambin og nerbiyos.
Apan sumala pa ni Banatasa nga wala kini magdahom nga makaako ang asawa nga maghikog kay sayo sa gabii nanglaag pa sila ug naglingawlingaw.
Sayo sa buntag sa dihang nadungog sa bana ang buto sa armas ug sa iyang pagsubay iyang nakita ang iyang asawa nga nahagba na sulod sa kasilyas nga dunay tapad nga .38 revolver.
Dali pa untang gidala sa Daanbantayan District Hospital si Elvie apan nakabsan gayod kini sa iyang kinabuhi.
Ang kapulisan mipadaplin na sa anggulo nga duna’y foul play ang maong hitabo gumikan kay nag-inusara sulod sa nahitaboan ang maong babaye.
Wa pa usab matino kun kang kinsa ug diin gikan ang maong armas. – /EIM) (BANAT NEWS)