CEBU, Philippines – Usa ka notadong tigpahuyot og shabu sa lungsod sa Dumanjug nakaikyas human kini nakigpinusilay sa mga polis diha sa Brgy. Pawa niadtong Domingo sa udto.
Ang nakaikyas mao si Basilio Quirante, giingong usa ka notadong drug pusher sa maong dapit. Apan atol sa maong operasyon nadakpan ang duha ka mga tawo nga sila si Sebero Balansag, 47, nga taga Brgy. Bulak sa maong lungsod nga nakuhaan og tulo ka gagmay nga pakete sa shabu ug Marlyn Quirante, 29, nga nakuhaan og duha ka gamay nga pakete sa gituohang drugas.
Matud pa ni Police Officer 1 Edmundo Sala ang desk officer sa Dumanjug Police nga nahinabi sa Banat News kauban nila ang Special Weapons and Tactics (SWAT) team nga nadestino sa maong lungsod, mga sakop sa Philippine Drug Enforcement Agency (PDEA-7) ug mga sakop sa Dumanjug Police pagronda sa lugar.
Apan matud pa nakabantay si Quirante nga polis ang iyang kaatubang ug dali kining nisulod ug nanirado sa iyang balay ug kalit nga mipaulan og bala sa mga polis diha sa gawas hinungdan sa nahitabong pinusilay.
Apan nasayran nga dunay sekretong agianan ang likod sa balay sa suspetsado ug didto kini milusot hangtod nakasibat.Way nangaigo sa maong engkwentro.
Sulod sa balay ni Quirante narekober sa mga polis ang usa ka dakong putos sa gituohang shabu nga wala pa nahibaw-i ang kantidad. – /EIM) (BANAT NEWS)