CEBU, Philippines - Maghatag og kalambuan sa nasud ang Asia-Pacific Economic Cooperation (APEC) matud ni Charles Jose, tigpamaba sa APEC Meeting nga ipahigayun sa Sugbo.
Matud ni Jose nga tuyo nga gilibot ang lugar sa meetings aron maapod ang benepisyo.
Usa niini ang inprastraktura sama sa pag-ayo sa mga karsada kung gikinahanglan sa dili pa ipahigayun ang APEC Meetings aron dili mahasol ang mga delegado.
Gawas niini, mouswag usab ang kalihukan sa pamatigayun, negosyo ug turismo.
Atol sa meetings, lakip sa gikinahanglan ang pagkaon diin pabor kini sa lokal nga ekonomiya ug daghan usab ang mahatagan og trabaho.
Sa Agosto 22 hangtud Oktubre ipahigayun sa Sugbo ang Senior Officers’ Meetings (SOM3).
Ang meeting nga ipahigayun maglangkub sa ministerial meetings sa structural reform ministers, transportation ministers ug energy ministers. Ang mga ekonomista sa 21 ka nasud ang moapil sa mao’ng meetings diin ang hisgutan mao ang kauswagan sa ekonomiya sa mga nasud sa Asya-Pasipiko lakip na niini ang Pilipinas. (BANAT NEWS)