CEBU, Philippines – Posible’ng nasaypan lang ang usa ka hingkod nga lalaki kinsa gipaulanan og bala sa dalan C. Padilla, Duljo Fatima, dakbayan sa Sugbo pasado alas 4 sa nakalabay nga kadlawon.
Ang biktima naila nga si Rey Carmilo Abas, taga sitio Plastikan sa mao’ng lugar.
Matud ni Police Officer 1 Reoful Adalim sa homicide section sa Cebu City Police Office (CCPO) nga ang inahan sa biktima niingon nga ang iya’ng anak ang usa sa gidudahan nga nikulata sa anak sa opisyal sa ila’ng barangay.
Ang ginikanan hugtanon nga nihimakak nga naapil ang iya’ng anak sa mao’ng hitabo.
Usa sa anggulo nga gisubay sa kapolisan kung wala lang ba gibaslan ang biktima sa ila’ng naingkwentro.
Naglakaw ang biktima sa mao’ng dapit diha’ng tulo ka motorsiklo nga may sakay nga lima ka tawo ang nisunod sa biktima ug dayun namusil.
Nakuha sa kapolisan sa crime scene ang lima ka basiyo sa .45 caliber pistol ug lima ka slugs.
Igo sa dughan, tiyan, buko-buko ug ubang bahin sa lawas ang naangkon sa biktima nga nakabsan diha-diha sa kinabuhi. – /GMR) (BANAT NEWS)