CEBU, Philippines - Ang Police Regional Office-7 mipahibalo nga hapit nang makompleto ang pagpangandam nila sa seguridad alang sa umaabot nga Asia Pacific Economic Cooperation (APEC) Summit nga himoon sa dakbayan sa Sugbo tulo ka semana gikan karon.
Gitug-an ni Chief Superintendent Prudencio “Tom” Bañas, direktor sa kapulisan sa PRO-7 ang problema sa trapiko usa sa ilang gikabalak-an ilabi na nga dunay mga rerouting nga ipatuman.
“One of the challenges is that ‘yung traffic. Iyan talaga yung isang challenge na nakikita ng mga organizers especially na daghan ang atong mga roads nga under construction,” matud pa ni Bañas.
Gitutokan na usab karon sa kapolisan ang mga petty crimes kon kadtong mga ginagmay nga krimen diha sa palibot sa siyudad nga makadaot sa imahen sa kapolisan sa Sugbo sa mata sa mga langyaw’ng delegado.
“We have to make sure that the delegates will not be involved even in minor incidents or crime like laglag-barya or pick pockets,” sumala pa ni Bañas.
Wa hinuoy nadawat nga report ang PRO-7 bahin sa hulga sa terorismo sa maong adlaw.
Atol sa APEC Summit aduna’y kapin tulo ka libong delegado ang mangabot dinhi sa siyudad ug maoy bantayan sa nuwebe mil ka mga polis. (BANAT NEWS)