CEBU, Philippines – Upat ka tawo ang nakalas samtang 43 ang naangol sa panagbangga sa duha ka bus pasaheroan sa national highway sa Barangay Sto. Niño, sa lungsod sa EB Magalona, Negros Occidental kagahapon sa buntag.
Giila ni Senior Inspector Conrado Rances, hepe sa kapolisan sa maong lungsod ang mga nakalas nga mao sila si Nina Paceno, 19, ang konduktor nga si Ronnie Javarro ug laing duha ka wala pa mailhi atol ning pagsulat sa balita.
Matud pang Rances, unang gikareport nga unom ang nakalas, apan ang duha nabantayan nga buhi pa ug daling gidala sa tambalanan.
Sumala pa sa imbestigasyon, ang drayber sa Ceres Bus 5126 padung sa Escalante City gikan sa Bacolod City nga si Leo Ciocon, 40, mi-overtake sa tuo sa gisundang sakyanan apan naapiki maong mibalik siya sa lane apan nawagtangan siya og control hinungdan sa pagkatumba sa iyang bus tunga sa karsada.
Niadtong higayona nagpadung usab ang laing Ceres Bus 5169 gikan sa Victorias City padung sa Bacolod City sa pikas lane ug nadasmagan ang natumba nga kaubang bus hinungdan sa pagkatumba usab niini.
Ang duha ka driver giimbestigar na sa kapolisan bahin sa aksidente. (Edwin Ian Melecio gikan sa The Freeman)