CEBU, Philippines – Nalandig sa tambalanan ang kapitan sa barangay Consolacion, Dalaguete human nadasmagan og motorsiklo nga ang drayber wala’y lisensya pasado alas 2 sa nakalabay nga hapon.
Ang biktima naila nga si Simeon Barrit, 82, minyo, samtang ang drayber sa motorsiklo naila nga si Thomas Yonto, 19, ulitawo nga taga barangay Nalhub sa maong lungsod.
Matud ni PO3 Jehaziel Huyo-a, desk officer sa Dalaguete Police, nga samtang naglakaw ang kapitan sa karsada kalit lang napunggit sa motorsiklo ni Yonto hinungdan nga kini nakaangkon og mga bun-og sa lawas ug pagkasamad sa agtang.
Hinuon luwas na sa kuyaw nga kahimtang ang kapitan samtang ang kapolisan nagpaabot pa sa pamilya kung mopasaka ba og kaso. – /GMR) (BANAT NEWS)