CEBU, Philippines - Namatay sa tambalanan ang hepe sa Asturias Police Station nga si Police Senior Inspector Glenn Devocion human nga giatake kini sa kasing-kasing kagahapong adlawa.
Sumala pa ni Senior Superintedent Noel Gillamac nga gipahibalo siya sa gidangatan sa maong opisyal. Nagduda siya nga giatake sa kasing-kasing si Devocion tungod sa kainit sa panahon.
Gipahinumduman karon ni Gillamac ang iyang mga sakop sa pag-amping kanunay ug sa pag-atiman sa ilang panglawas.
Gani miingon siya nga mas maayo nga mag-exercise sila ilabi na niadtong tambok nga mga polis.
Si Police Officer 3 Exelsiur Aguanta, desk officer sa Asturias Police Station miingon nga duna sila’y text message nga nadawat gikan sa cellphone number ni Devocion nga nagpahibawo nga namatay na kini.
Matud pa ni Aguanta nga didto namatay sa Cebu Doctors Hospital ang opisyal ug wala sa police station.
Sumala pa ni Gillamac nga si Devocion didto kini gikan sa lungsod sa Tabogon sa wala pa kini gi-assign sa Asturias. (BANAT NEWS)