Nagpailang sundalo na buy-bust
CEBU, Philippines - Lalaki nga nagpailang sakop sa Philippine Army nasikop sa kapolisan lakip na sa duha ka lalaki nga pag-umangkon og mga barangay kapitan sa lungsod sa Medellin.
Ang nasikop naila nga si Reynaldo Abachanan, nga nangalyas nga siya si “Captain Rey Mendoza” ug “Major Revron Mendoza.”
Samtang ang iyang mga “sidekicks” naila nga sila si Ritchie Labrada, 35, ug si Leodegario Villafuente, 45, pulos taga Daanlungsod, Medellin.
Si Senior Police Officer 1 Ryan Castro miingon nga dugay na nilang gi-surveillance ang mga suspek ug dihang nakompirmar ang report gihimo ang buy-bust operation pinangulohan ni Senior Inspector Christopher Fernandez.
Matud pa nga gipalitan og duha ka paketeng shabu nga nagkantidad og P500 ang mga suspek hinungdan nga sila gidakop.
Nakuha gikan ni Abachanan ang usa ka dakong pakete nga shabu, duha ka medium size nga pakete, 27 ka gagmay nga pakete pulos dunay sud nga shabu, ang marked money, P300 nga gituohang kinitaan sa drugas, drug paraphernalia, usa ka kalibre .45 nga pistola nga may tulo ka bala, duha ka motor, ID sa Armed Forces of the Philippines, ug listahan sa utangan sa shabu. (BANAT NEWS)
- Latest
