CEBU, Philippines – Subli na usab nga mipahigayon og lihok protesta ang mga sakop sa PISTON ug Bayan Muna Central Visayas nga nanukad gikan sa Fuente Osmeña Circle paingon sa dalan Colon kagahapon sa buntag.
Nasayran nga gawas sa maong rally ang PISTON mihimo usab og piket gawas sa usa ka oil company nga nahimutang sa siyudad sa Mandaue gumikan na sa sunod-sunod nga oil price increase.
Midiretso usab sila sa buhatan sa City Traffic Office Management (CITOM) aron ipaabot ang ilang reklamo kalabot sa mga ordinansa sa siyudad sa trapiko.
Mikisikisi usab sila nganong gipalutsan og mga bench warrants ang mga badlungong mga drivers nga nakalapas sa lagda sa trapiko sa siyudad.
Gihimug-atan ni Greg Perez, tsirman sa maong grupo nga daw gihimong kriminal ang mga drivers gumikan sa maong ordinansa.
Apan ang mga CITOM officials daan nang miesplikar nga gihimo nila kini aron madisiplina ang mga drayber nga motadlas sa Cebu City ilabi na nga dili sila makaisyu og temporary operators permits gikan sa Land Transportation Office.
Nasayran nga ang iisyu nga citation tickets sa CITOM wala hatagi og importansiya sa mga drayber kay dili man sila makasakmit og lisensiya hinungdan nga nagtipun-og ang mga multahan sa mga drayber diha sa CITOM mao nga gipasaka na kini sa korte. – /EIM) (BANAT NEWS)