CEBU, Philippines - Nasuko si Mayor Michael Rama sa paghulip sa kasamtangang pangulo sa Cebu City Police Office, Senior Superintendent Conrad Capa, nga wala moagi kaniya.
Si Rama nga kagahapon lang niabot gikan sa Japan nasagmuyo human nasayud nga si Capa gihulipan na ni Senior. Supt. Marciano Batiancela Jr.
Matud ni Rama nga dunay kasabutan nga wala’y ibalhin sa pwesto hangtud wala pa’y matudlo nga permanente nga director sa Philippine National Police.
Si Police Regional Office-7 Director Prudencio Tom Bañas ang gitumbok ni Rama nga responsabli sa kalit nga aksiyon sa pagtudlo kang Batiancela hulip ni Capa.
“Let’s not jump right away and be too quick with our decision because haste makes waste. I would also too circumspect…and exercise caution,” sigun ni Rama.
Matud ni Rama nga wala kini nagpasabot nga dili niya dawaton si Batiancela apan wala lang siya kauyon sa nahitabo.
Nagduda si Rama nga politika ang nagpaluyo sa lakang ni Bañas ilabi na nga paingon na sa eleksiyon.
Si Batiancela nakaserbisyo na sa CCPO gikan 2001 hangtud 2009 isip hepe sa Mabolo, Waterfront ug San Nicolas Police Stations.
Samtang pilion gyud ni Rama ang mamahimo’ng direktor sa CCPO gikan sa “short list” nga iduso kaniya. (Gikan sa The Freeman/GMR)(BANAT NEWS)