CEBU, Philippines – Nahasol ang mga mayor sa habagatang bahin sa Sugbo nga naigo sa bagyo’ng Yolanda sa pagpangapod-apod sa Emergency Shelter Assistance (ESA) gikan sa Department of Social Welfare and Development.
Gipadayag sa mga mayor ang ilang kahasol atubangan sa mga sakop sa hunta probinsiyal sa Sugbo human sila gipatawag pinaagi sa sugyot ni Bokal Sun Shimura.
Usa sa nakahasol ang lagda sa DSWD nga gihulagway ni Shimura nga dili makiangayun tungod kay kadtong namuyo daplin sa dagat ang lakip sa dili mahatagan.
Si Mayor Ricky Ramirez sa lungsod sa Medellin nagkanayun nga sila mao’y napasanginlan sa mga tawo kabahin sa lagda sa DSWD sa pag-apod-apod sa mga hinabang.
Gani si Ramirez nitumbok nga ang tseke sa ESA alang sa Medellin gipetsahan og Disyembre 29, 2014 apan gihatag sa DSWD buwan na sa Marso ning tuiga.
Ang tseke nakuha na apan ang DSWD may bag-ong lagda ug ang mga mayor ang gipangbasol sa mga tawo.
Atol sa sesyon sa hunta probinsiyal kagahapon, si Shimura niiduso og mosyon pag-awhag kang DSWD Secretary Corazon Soliman sa paghatag sa ESA sa tanang nakalista nga biktima sa bagyo. – /GMR) (BANAT NEWS)