CEBU, Philippines - Gawas sa Inayawan, duna pa’y laing 10 ka barangay sa dakbayan sa Sugbo ang gitutukan karon sa kapolisan nga duna’y taas nga talaan sa kriminalidad.
Kini ang gitug-an ni Konsehal Dave Tumulak dihang nibisita sa Cebu City Police Office kagahapo’ng adlawa.
Si Tumulak nagpasalamat sa kapolisan sa pagbutang og mga polis sa barangay Inayawan aron matagad ang mga nahitabo’ng pagpamusil nga niabot na sa 34 ka kaso ug 16 ang namatay sukad sa niaging tuig.
Tuyo sa officer in-charge sa CCPO, Senior Supt. Conrad Capa, nga maundang na ang mga nahitabo’ng pagpamusil sa maong lugar.
Usa sa gisubay nga frat war ang posible’ng hinungdan sa mga patay sa maong barangay. Si Capa nipasabot nga iyang gusto nga mailhan ang mga suspek sa mga krimen aron masikop. (BANAT NEWS)