CEBU, Philippines - Mokabat sa unom ka milyones ka pesos nga kantidad sa marijuana ang gilarot sa hiniusang operasyon nga gilusad sa Philippine Drug Enforcement Agency (PDEA)-7 ug 5th Special Forces Company sa 2nd Special Forces Battalion sa Barangay Bayong lungsod sa Balamban niadtong Lunes sa buntag.
Matud pa sa gipadalang pamahayag sa 3rd Civil Relations Group sa Central Command, ang grupo ni Second Lieutenant Al-Qatar Kamlian ang admin officer sa 5th SF Company, nakig-alayon kanila ang taga PDEA-7 human sila nakadawat og impormasyon bahin sa plantasyon sa marijuana sa maong barangay.
Matud pa nga base sa ilang impormasyon, armado ang mga lalaking nagbantay sa maong mga marijuana hinungdan nga nagpatabang sila sa kasundalohan.
Apan sa pag-abot sa tropa sa maong dapit, wala silay tawo nga naabtan sa maong dapit.
Mokabat sa 33,000 ka mga dagkong punoan sa marijuana ug duna pa’y 4,000 ka mga bag-ong tubo sa maong tanom ang ilang gipanglarot ug gidauban diha mismo sa lugar.
Sigun pa ni Kamlian nga lisod dumdumon ang maong plantasyon tungod kay gipangtanom kini kilid sa mga kimba, ilawom sa kakahoyan ug walay agianan.
Nagpadayon pa ang mga awtoridad pagtino kung si kinsa ang mga nananom niini. (BANAT NEWS)