CEBU, Philippines — Usa ka 33-anyos nga lalaki ang nakit-ang mikirig human siya miinom og cyanide kon kuskos kagahapon sa buntag didto sulod sa iyang kuwarto sa Barangay Poblacion, dakbayan sa Lapu-Lapu.
Matud ni PO2 Jomar Florentino sa Lapu-Lapu City Police Office- Homicide Section, nga si Jerry Savedo nakit-an na lang sa iyang kapuyo nga adunay ka-text sulod sa ilang kwarto.
Wala makaamgo ang kapuyo sa biktima nga nagplano na diay og dautan si Savedo ug pagkataud-taud nakadungog na lang siya og lagubo sa kuwarto.
Tungod kay nakuryuso ang kapuyo kun unsa’y gihimo ni Savedo, iyang giadto ang ilang kuwarto ug nakurat siya pag-ayo pagkakita nga nagkirig-kirig si Savedo samtang nagkupot sa plastic bottle sa juice drink.
Gituohan sa kapolisan nga gisagolan sa biktima og cyanide o hilo sa isda ang iyang giinom nga juice.
Ang nakurat nga kapuyo puwerte’ng nakasinggit og tabang ngadto sa iyang silingan ug gidala nila sa Lapu-Lapu City District Hospital si Savedo apan gideklarar kini sa mga doktor nga patay na.
Si PO2 Florentino midugang nga mao kini ang ikatulo’ng higayon nga misuway’g pakamatay si Savedo ug kagahapon sa buntag nadayon na g’yud siya’g kamatay.
Wala makahibalo ang kapuyo sa biktima ug ang iyang mga kabanay kun unsa’y rason nga si Savedo miunay man og hunos sa iyang kinabuhi.
Ang kapolisan wala pa motug-an kun gisusi na ba nila ang mga text messages sa cellphone sa namatay kay matud sa kapuyo nakit-an niya kini nga adunay ka-text sa wala pa maghikog.
Gisusi pa usab sa kapolisan kun ngano nakahupot og cyanide si Savedo nga maoy gigamit niini sa pagpakamatay. (BANAT NEWS)