Cebuano PNP-SAF troopers gilubong na

CEBU, Philippines – Gilubong na kagahapon ang duha ka Sugboanong sakop sa PNP-Special Action Force nga nakalas uban sa 42 nila ka mga kauban sa nahitabong engkwentro dihang ilaha untang dakpon ang duha ka terorista nga sila si Zulkifli Abdhir alyas Marwan ug Basit Usman.

Gikan sa St. Peter Funeral Homes sa Imus, gidala ang patay nga lawas ni Police Officer 2 Wendell Candano sa Saint Ignatius de Loyola Chapel sa PRO-7 alang sa iyang requiem mass.

Nagsugod ang misa pasado alas 10:00 sa buntag ug si Superintendent Arnolfo Castillo, Regional Chaplain ang mihalad sa misa kauban ni Fr. Victor Gonzaga,OAD.

Sa iyang wali miingon si Supt. Castillo nga bulahan kadtong mga tigpatunhay sa kalinaw kay pagatawgon sila nga anak sa Ginoo.

Mipaabot usab sa ilang simpatiya ang kapin 50 ka mga kanhi SAF commandos sa tibuok rehiyon nga gipangulohan nila ni Senior Supt. Edward Carranza, directorial staff chief ug Senior Superintendent Conrad Capa, deputy director for operations sa PRO-7 ug  ang deputy chief sa Regional Intelligence Branch nga si Supt. Rex Derilo.

Si Chief Supt. Orlando Ualat, deputy regional director for administration maoy mihatag sa eulogy ug nanamilit sa nakalas nga polis sa pag-ingon “goodbye our hero.”

Human sa iyang eulogy miatubang si Ualat sa lungon ug misaludo, dungan niini ang paglinya sa 30 ka kanhi SAF commandos alang sa pag-agi sa lungon nga giyayongan sa walo ka pallbearers.

Si Candano gilubong sa Cebu South Memorial Garden sa dakbayan sa Talisay.

Samtang sa Consolacion, susamang suporta usab ang gihatag sa mga polis, kahigalaan ug kabanay sa nakalas nga si PO1 Romeo Cempron. Si Chief Supt. Prudencio Tom Bañas, hepe sa PRO-7 namulong nga di makuwestiyon ang kaisog ug dedikasyon ni Cempron sa pagserbisyo tungod sa sakripisyong iyang gihatag sa nasud.

Ang kapikas ni Cempron nga si Christine emosyonal usab nga nangayo og pasaylo niadtong mga tawong nasad-an sa iyang bana nga unta kalimtan na kadto. Ang pamilyang Cempron ug Candano nanawagan og hustisya ug katin-awan sa nahitabo niadtong Enero 25 sa Tukanalipao, Mamasapano, Maguindanao. – /EIM) (BANAT NEWS)