CEBU, Philippines - Grupo sa mga doktor gikan sa lainlaing nasud nga ginganlan og No-Scalpel Vasectomy International Inc. (NSVI) ang mopahigayun og libre’ng pagkapon sa mga interesado’ng lalaki sa Sugbo nga dili na gustong makapa-anak.
Matud ni Dr. Ramon Suarez nga ang libre’ng serbisyo usa sa tumong sa ilang pagtabang sa mga Sugbuanon aron sa pagkontrol sa nagkadagha’ng populasyon.
Dili angayang kabalak-an ang "no-scalpel vasectomy" o pagkapon sanglit luwas, simple, dali ug dili na kinahanglan samaran o tahian ang kinatawo sa lalaki atol sa maong proseso. Sigun ni Dr. Doug Stein, development director sa NSVI, nga 14 ka tuig na nila’ng gihimo ang kalihukan nga gisugdan sa Guihulngan, Negros Occidental ug siya mismo inubanan ni Suarez ang napaubos na sa maong proseso sa pagkapon.
Tungod ang pasyente sa pagkapon tambagan nga dili motrabaho og bug-at sulod sa duha hangtud tulo ka adlaw, adunay P1,000 nga ihatag aron sa pagsuportar sa pamilya samtang mopahuway sa trabaho.
May "NSVI Pantawid Livelihood Assistance" nga gihimo ang maong grupo diin hatagan nila og P100 ang mga benepisyaryo nga gamay og kita nga ilang ma-edukar o mopahibawo ug mopaubos sa proseso.
Ang NSVI mopahigayun usab og orientation ug educational seminar usa sugdan ang proseso sa pagkapon aron mapasabot ug matabangan ang mga pasyente sa pagdesisyon kun andam na ba sila magpakapon.
Himuon ang orientation ug libre’ng pagkapon karong adlawa sa Danao Provincial Hospital, ugma sa Tuburan District Hospital ug sa Sabado sa hapon, Lunes ug Martes sa Southwestern University Sacred Heart Hospital. (BANAT NEWS)