CEBU, Philippines - Patay na nga nakit-an ang usa ka lalaki nga gikataho’ng nakuryentehan samtang nanugway sa kabaw sa sitio Camang-camang, barangay Ocaña, dakbayan sa Carcar niadto’ng nakalabay nga buntag.
Ang namatay naila nga si Epifanio Padayao, 42, ulitawo ug nagpuyo sa maong lugar.
Matud ni SPO1 Randy Chavez, desk officer sa Carcar City Police, nga samtang naglakaw si Padayao sa maong lugar wala nakabantay sa wire sa poste nga iyang nahawiran.
“Linya gyud to sa kuryente gikan sa poste paingon sa balay nga na-ubos na kaayo, nahawiran niya,” matud ni Chavez.
Ang igsuon nga babaye sa biktima ang dali pa unta nga nidala ni Padayao sa Carcar Provincial Hospital apan patay na kini nga naabot sa maong tambalanan.
Sumala pa ni Chavez nga ang tagtungod nagplano nga mopasaka og kaso batok sa electric company tungod sa kamatayun ni Padayao. (BANAT NEWS)