CEBU, Philippines – Nakasibat ang usa ka pusher dala ang P500 nga marked money atol sa buy-bust operation sa sitio San Antonio, Jubay, lungsod sa Liloan alas 5 pasado sa hapon sa niaging Sabado.
Apan tulo niya ka kauban ang nasikop ug nakuhaan og 12 ka pakete’ng shabu ug tulo ka dagku’ng putos sa gituohang shabu.
Si SPO3 Bryan Batiquen sa Liloan Police Station niila sa tulo nga nadakpan nga sila si Reolito Barcenas alyas Tolets, 36, nga taga sitio Fatima, Edwin Noval, 36, taga Purok 2, ug Ryan Baga, 31, pulos nagpuyo sa maong barangay.
Ang nakasibat mao si Raymond Baya alyas Bolodong nga maoy tuyo sa buy-bust operation.
Matud ni Batiquen nga si Senior Inspector Ramil Morpos, hepe sa Liloan Police Station, ang nangulo sa operasyon human sa pipila ka adlaw nga pagpaniid sa ilegal nga kalihukan ni Baya.
Dihang gitunol na sa poseur buyer ang shabu ug gidawat na niini ang buy-bust money, dali unta kini’ng gigunitan apan nakawakli sa iyang kamot ug nikaratil og dagan suot sa daghang kabalayan si Baya.
Ang tulo ka kauban nga nahibilin ang wala na makalihok sa ilang nahimutangan ug maoy dali nila’ng napusasan ug ilang nasakmit gikan sa tulo ka dinakpan ang maong gidaghanon sa shabu uban sa mga drug paraphernalia. – /GMR) (BANAT NEWS)