CEBU, Philippines - Gipatuman na sa dakbayan sa Lapu-Lapu ang P7 nga pletehan sa traysikol sa niaging Biyernes.
Kini human sa gipatawag ni Mayor Paz Radaza nga public consultation sa mga tricycle drivers niadtong Huwebes sa pagpakunhod og P1 sa pletehan nunot sa pagbarato sa gasolina.
Gipangulohan ni Felix Gila, presidente sa Lapu-Lapu Confederation of Tricycle Operators and Drivers Association, 300 niya ka sakop ang nitambong sa tigum.
Matud ni Gila nga mopalabang sila og board resolution nga pirmahan ni Konsehal Eddie Cuizon, pangulo sa committee on transportation ug ni Radaza karong Lunes.
Ang mga drayber nga dili motuman sa bag-ong pletehan masuspenso sulod sa tulo ka buwan.
Kapin sa 3,000 ang mga narehistro nga traysikol og 2,684 nga drayber ang nalista sa dakbayan sa Lapu-Lapu. (BANAT NEWS)