CEBU, Philippines – Gipahimuslan sa mga public utility jeepney (PUJ) drayber ang pagdagsang sa pasahero nga nitambong sa mga kalihukan sa kapistahan ni Senior Santo Niño ug sa Sinulog sa dakbayan sa Sugbo.
Naglakip sa ilang pagpahimulos ang pagkolekta og mahal nga pletehan sama sa P25 gikan sa dakbayan sa Mandaue kutob sa Pier 3.
Ang mga drayber nga nagbuhat niini mao kadtong gikan sa laing rota sama sa Liloan-Mandaue nga nilabyog lang tungod sa ka daghang pasahero padulong sa dakbayan sa Sugbo.
Ang mga PUJ nga nagbiyahe sa Mandaue-Ibabao kutob na lang sab sa Highway ug ang plete tag P12. Nagpahimulos sab sa pagdagsang sa daghang pasahero ang mga rota nga O1K nga nagbiyahe sa SM hangtud sa Park Mall nga nangolekta gihapon og P8 ang plete sa matag pasahero.
Gipangatarungan sa konduktor nga P8 gihapon ang minimum nga pletehan sa PUJ kay ang Land Transportation Franchising and Regulatory Board wala makahatag kanila og taripa. Kini daku’ng sukwahi sa giluwatan nga pamahayag ni LTFRB-7 Director Reynaldo Elnar nga ang taripa mahimo na nga kuhaon nga libre sa ilang buhatan. Usa ka PUJ nga rota og Talamban-Cebu City ang nilabyug sa pagpamasahero og Cathedral-SM ug nangolekta og tag P10 nga plete. – /GMR) (BANAT NEWS)