CEBU, Philippines - Gibuksan kagahapon ang Devotee City alang sa dul-an dos mil ka deboto gikan sa lagyo’ng lugar nga wala’y mapuy-an atol sa kapistahan ni Señor Santo Niño. Nangabot ang mga deboto niadtong Huwebes sa gabii ug giabi-abi sa mga kawani sa kagamhanan sa dakbayan sa Sugbo
Nigahin og P1.1 milyones ang kagamhanan sa dakbayan sa Sugbo alang sa pagbalhin sa 120 ka container vans nga gipagamit sa 2GO Shipping Lines aron himuong temporaryong kapuy-an. Maka-okupar og tres mil ka tawo ang 120 ka container vans.
Ang Devotee City adunay duha ka telephone lines gikan sa PLDT ug Free WiFi. Ang Metropolitan Cebu Water District mohatag sa libre nga tubig mainom ug para kaligo, ang Visayan Electric Company maoy maghatag sa suga sa mga container vans, libre’ng kape gikan sa Kopiko ug uban pa nga mga business establishment ang mohatag og libre nga mga panginahanglan para sa mga deboto.
Bantayan og mga polis ang Devotee City ug mga tanod gikan sa barangay Ermita, Santo Niño ug San Roque. (Sheriza Mae Uy, USJR Intern/GMR)(BANAT NEWS)