CEBU, Philippines – Higpit nga gipahimangnoan sa kapolisan ang mga deboto sa dakbayan sa Mandaue nga mag-atang sa kadalanan atol sa Traslacion karong Biyernes sa buntag ug sa foot procession sayo sa Sabado sa dili pagdala og balloon.
Si Senior Inspector Allan Cuizon, deputy chief for operation ug public information officer sa Mandaue City Police Office (MCPO), miingon nga makamugna og kahasol ang pagdala og balloon ug ang pagdagkot og pabuto sa mag-atang sa kadalanan.
Sumala pa niya nga hayan makawagtang pa hinuon kini sa kamabulokon ug pagkabalaanon sa relihiyosong kalihukan.
Dugang ni Cuizon nga makahatag og kahasol ang pagduslit og pabuto daplin sa dalan atol sa paglabay sa karo kay gawas nga daghan ang makuyawan, kuyaw usab nga adunay mapiksan.
Si Senior Inspector Jimmy Portes, hepe sa Presinto 1 sa MCPO, miingon nga nagkinahanglan pa nga ang legal nga basehanan sa kapolisan sa pagsakmit sa ibaligya nga mga balloon hinungdan nga ang ilang mahimo niini’ng higayona mao lang ang pag-awhag sa mga deboto sa dili pagpalit atol sa maong kalihukan. – /GMR) (BANAT NEWS)