CEBU, Philippines - Daghang mga negosyante ang maalkanse sa higayon nga iimplimentar na ang Bus Rapid Transport system sa dakbayan sa Sugbo.
Karong adlawa tukion sa mga sakop sa ahensyang naghikay sa Cebu-Bus Rapid Transit ang social impact niini. Matud ni Atty. Rafael Yap, hepe sa BRT, ang mga opisyal sa Land Transportation Franchising and Regulatory Board, Department of Transportation and Communication ug miyembro sa BRT-technical working group mobuhat og social management plan sa BRT project tungod kay napanglantawan nila nga dunay maapektahang sector niini. “We really have to carefully peruse the project’s social aspect as there would be displacement otherwise we will be in big trouble socially,” matud niya. Matud ni Yap nga kinahanglan masulbad ang problema sa dislokasyon sa dul-an tres mil nga mga jeepney drivers ug kapin sien mil ka mga business enterprises sa dakbayan sa di pa kini iimplimentar karong 2017. Base sa pagtuon sa Woodfields Consultant Incorporated, ang gikomisyon sa DOTC aron mohimo sa BRT feasibility study, ang maapektahang mga balay patigayon moresulta og income losses nga nagkantidad og P36.1 million matag tuig. Ang national government mogahin lamang og P1.27 bilyon aron pagpalit ug pag-ugmad sa resettlement sites sa Barangay Sinsin ug Labangon. Dunay bahin niini nga ibayad sa maapektahang negosyante sa maong proyekto aron ulian ang ilang alkanse. Ang panagtigom himuon sa buhatan sa Department of Public Works and Highways sa South Road Properties sugod karong alas-9 sa buntag ngadto alas -3 sa hapon. (BANAT NEWS)