CEBU, Philippines – Onse ka balay ang naugdaw sa usa ka sunog sa Sitio Sampaguita, Barangay Guadalupe, luyo sa buhatan sa Department of Agriculture-7 ning dakbayan sa Sugbo kagahapon sa buntag.
Matud pa sa imbestigador sa Cebu City Bureau of Fire Protection nga si Senior Fire Officer 3 Emeliano Daño nga ilang nadawat ang alarma alas-11 sa buntag ug ilang nakontrolar sulod sa 20 minutos.
Sigun pa ni Daño nga ang sunog nagsugod sa balay ni Rodolfo Quilala nga giabangan ni Carlito Capa Jr., 42, kinsa wala sa balay atol sa hitabo.
Gipasabot ni Daño nga sa nakuha niya nga impormasyon nga duna’y mga bata nga nagdula og balay-balay sa ikaduhang andana sa maong balay ug migamit sila og kandila nga maoy gituohang sinugdanan sa sunog. Kasagaran sa mga balay hinimo sa light materials maong daling mikatap ang kalayo ug lisod usab sudlon sa mga bombero ang dapit tungod sa sapa nga nag- uwang sa mga balay ug sa dalan diin kutob ang firetrucks maong gisumpay-sumpay na lang ang mga fire hoses.
Usa ka singko anyos nga bata ang mitug-an sa mga tigbalita nga nagduwa og kandila ang iyang mga amigo sa ikaduhang andana sa balay diin nagsugod ang sunog. Dihang miulbo na ang sunog dali niya nga gikuha ang iyang mga igsoon edad 4 ug 6-anyos aron mogawas sa ilang balay. Gibanabanang P250,000 ang danyos sa maong sunog ug walay nareport nga nakalas o naangol sa hitabo. Si Cebu City Vice Mayor Edgardo Labella miadto ‘sab sa lugar ug mimando na sa paghatag og pagkaon sa mga nasunogan nga gipahiluna karon sa gymnasium sa barangay.
Duna say ihatag nga pinansiyal nga tabang sa mga tag-iya sa balay ug sa mga nag-abang lang sa mga lawak sa balay ug susihon usab kun sila maoy tinud-anay nga tag-iya sa luna.
Samtang nakan-an sa kalayo ang duha ka andanang balay sa Purok Gabi, Barangay Gun-ob, Dakbayan sa Lapu-Lapu nga gipanag-iya sa usa ka Lorgina Sayson. Si Fire Officer One Climaco Salisid miingon nga nagsugod sa division wall sa lawak niini ang sunog apan napawong kini dayon sud sa tulo ka minutos apan nagbilin kini og P50,000 nga danyos. – /EIM) (BANAT NEWS)