CEBU, Philippines - Mangayo og dugang usa ka libo ka mga polis ang Cebu City Police Office aron patabangon pagbantay sa kasaulogan sa Sinulog 2015 nga ipahigayon sa siyudad karong Enero 18.
Si CCPO officer in-charge Senior Superintendent Conrad Capa mibutyag sa mga tigbalita nga gipaabot niyang modagsa na usab ang mga tawo dinhi sa dakbayan sama sa nangaging mga selebrasyon sa Sinulog.
“We already have our plan for Sinulog in coordination with the organizing committee, we have also requested additional personnel from the region which I believe is forth coming. I requested a thousand personnel all over the region,” matud pa ni Capa.
Gipasabot sab ni Capa nga gawas sa dugang nga mga polis gikan sa rehiyon 7 apil ‘sab sa motabang sa seguridad ang mga barangay tanod, volunteers ug mga marshals atol sa maong kalihokan.
Giandam nang daan ni Capa ang kaugalingon nga ang Sinulog sa Sugbo sama sa kadaghan sa mga tawong manambong sa pangilin sa Black Nazarene sa Manila nga milyon ka mga deboto ang mokuyog sa prosisyon.
Mao pa kini ang labing unang higayon ni Capa nga masaksihan ang Sinulog sa Sugbo ug dili lang basta tumatan-aw kondili isip ground commander sa security personnel sa gibansagang Queen of Festivals sa habagatan. (BANAT NEWS)