Mayor Chiong di na makadugang og pundo sa Dagitab Festival 2015

CEBU, Philippines – Si Mayor Valdemar Chiong sa dakbayan sa Naga naglaom nga dunay dugang pa nga mga pribadong sektor nga mosalmot sa Dagitab Festival sa tuig 2015 human sa malampusong 7th Dagitab Festival niadtong Disyembre 23, 2014.

Matud ni Chiong nga kung mga pribadong sektor maoy mosalmot dili makapagawas og budget ang siyudad.

Matag tuig ang mga national high schools sa siyudad maoy kasagarang mosalmot sa festival nga gastohan sa  siyudad og P100 mil isip “subsidy” sa ilang mga nagasto sa costumes, props ug uban pa.

Matud pa ni Chiong nga dili na makagahin pa og dugang pang budget alang sa mga subsidy ang siyudad niadtong mga buot pang mosalmot sa festival karong tuig 2015.

Mao kini hinungdan nga mas malipay siya kun dunay pribadong sektor nga mosalmot sa Dagitab Festival’ 2015 aron mas monindot pa apan wala magkinahanglan og dakong gastos sa dakbayan.

Niining ulahing Dagitab Festival, ang nagpabiling kampeyon ang Professional Academy of the Philippines (PAP). Gikuptan nila kini sud na sa tulo ka tuig.

Ang PAP o Tribu Makiangayon mi-representar kini sa Barangay South Poblacion ug mao usab ang napiling best in street dancing ug ritual showdown ug nakadawat og premyo nga P30,000 ug P55,000.

Gawas  niini, ang PAP napili usab nga best decorated audio van, best in costume ug best in choreography.

Subay niini,  ang Uling National High School o Pundok sa Nagkahiusang Pamilya maoy second placer  sa ritual showdown ug nakadawat og P40,000 nga premyo.

Misunod ang Tuyan National High School o Tribu Kalikasan nga nakadawat og P30,000 nga premyo.

Ang Uling National High School napili usab kining second winner sa street dancing samtang ang Siena School of Naga o Banay San Pedro Calungsod nga mi-representar sa Barangay East Poblacion napili sa ikatulo nga pwesto.

Ang ubang contingents nga wala makadaog nakadawat gihapon og tag P15 mil nga consolation prizes, trophy ug certificate.

Si Bise Gobernador Agnes Magpale kinsa misaksi sa kalihukan nakabantay sa pag-uswag sa performance sa dancing contingents.

Ang Dagitab Festival nag-promote sa diwa sa Pasko ug panagtinabangay sa Naganhon. (BANAT NEWS)