Usa suspek sa nubain sa CPDRC gibuhian

CEBU, Philippines – Nakalingkawas sa kaso ang usa sa duha ka babaye nga gipasanginlan nga nipalusot og nubain sa Cebu Provincial Detention and Rehabilitation Center (CPDRC).

Si Romeo Manansala, jail warden sa CPDRC, nagkanayon nga si Resty Arsenal gipabuhian sa piskal niadtong Lunes tungod kay wala masakpi nga naggunit og nubain.

Si Jovelyn Daclan ang napasakaan og kasong kalapasan sa Comprehensive Dangerous Drugs Act apan nakapiyansa kagahapon sa buntag alang sa iyang temporaryong kagawasan.

Samtang si Christian Casinillo kinsa giingong mi-tape sa unom ka ampoules sa nubain sa iyang kinatawo ug nasakpan atol sa inspeksiyon ang natanggong karon sa Guadalupe Police Station.

Higpit nga seguridad ang gipatuman karon sa CPDRC ilabi na niining pagpahigayon og Christmas party sa mga piniriso ug sa paghatag og pagtugot nga makatulog diha sulod sa prisohan ang mga pamilya sa piniriso.

Matud ni Manansala nga 12 ka blue guards ang gidestino karong adlawa ug sa Disyembre 31 diin ang mga pamilya tugutan nga makatulog sulod sa prisohan sa pagsugat sa Bag-ong Tuig. – /GMR) (BANAT NEWS)