CEBU, Philippines – Samtang nagsingabot ang kasaulogan sa Pasko ug pagsugat sa Bag-ong Tuig, gipangtaptapan na usab ang mga sumbohan sa mga armas sa mga polis dinhi sa dakbayan sa Sugbo, probinsiya ug sa rehiyon sugod kagahapon sa buntag pagkahuman sa flag raising ceremony.
Sa dakbayan sa Sugbo, si Superintendent Alet Virtucio, ang deputy chief sa Cebu City Police Office nga nahinabi sa Banat News miingon nga ang maong kalihokan pagpakita sa katawhan nga usa ang kapolisan nga mosugat sa Pasko pinaagi sa malinawong paagi.
Sumala pa ni Virtucio nga kini ‘sab magpakita nga ang mga polis ang magsilbing ehemplo nga dili magpabuto sa armas panahon sa kapaskohan.
“Pagpakita din ‘yan sa mga tao na ang mga polis ang maging example na bawal magpaputok na baril sa Pasko at Bagong Taon,” matud pa ni Virtucio.
Usa sa gusto nga mahitabo ug tumong sa maong pagtaptap nga wala na unya’y mga sibilyan nga maigo sa mga saag nga bala dinhi sa siyudad. Ang mga sumbohan sa mga armas sa mga polis ang gipangtaptapan kini og plastic tape ug ibabaw sa tape dunay pirma sa ilang mga opisyal sa kapulisan sa CCPO.
Nanguna sa pagpirma sa mga sumbohan sa mga polis sa dakbayan si Officer In-Charge Chief Senior Superintendent Conrad Capa kauban ang iyang duha ka deputy nga sila si Supt. Arnel Banzon ug Supt. Alet Virtucio.
Nagpasidaan ‘sab ang opisyal sa mga sakop nga mag-atubang g’yud sila og kasong kriminal ug administratiba kun mopabuto sila sa ilang mga armas sa walay igong rason.
Karong Enero 5, 2015 pa gikatakdang tangtangan sa mga taptap ang mga sumbohan sa mga armas ug si Virtucio nanghinaot nga wala’y sakop sa CCPO ang mosupak sa maong kamanduan.
Sa Cebu Provincial Police Office (CPPO) ug sa Police Regional Office-7 gipangulohan ‘sab sa mga tag-as nga opisyal sa maong buhatan ang naasoy nga kalihokan. – /EIM) (BANAT NEWS)