CEBU, Philippines - Nagkadaiyang kalihukan ang ipahigayon sa dakbayan sa Toledo tipik sa pagsaulog sa pasko.
Matud ni Riza Rafols, pangulo sa City Tourisms Office, nga sama sa nakalabay’ng tuig ipahigayon gihapon ang Christmas Tree contest diin duha na ka kategoriya. Kini mao ang Open category nga salmotan sa nagkadaiya nga pribado’ng sektor ug ang barangay category.
Matag kategoriya adunay gitagana nga mga criteria nga maoy sundon. Sa barangay category kinahanglan nga ibutang atubangan mismo sa barangay hall ang ilang mga christmas tree.
Samtang ang Open category ipabutang sa Toledo City public plaza ang ilang mga christmas tree. Ang modaug sa matag kategoriya adunay madawat nga cash prizes nga gigahinan og pundo sa kagamhanan sa dakbayan sa Toledo.
Tumong sa maong kalihukan nga mapanindot ang palibot sa plaza sa Toledo tungod sa maong mga dayan-dayan ug makita ang pagkahiusa sa matag barangay pinaagi sa katukuran sa matag christmas tree. (BANAT NEWS)