CEBU, Philippines – Usa ka polis nga nadestino sa Regional Health Services-7 ang midangop sa Mabolo Police Station kagahapon sa hapon human nga usa ka laing polis nga nadestino sa Cebu Provincial Police Office ang matud pa mihulga kaniya sulod sa Camp Sotero Cabahug sa Cebu City Police Office Headquarters ug diriyot pa sila nga nagkasinukmagay.
Si Police Officer 2 Jonas Combras, neuropsychological examiner, nagpa-blotter sa Mabolo Police Station human giingong gihulga ni PO3 Christian Penafiel. Sa police blotter report sa Mabolo Police nga nakuha sa Banat News, si Combras misaysay nga pasado alas-8 sa buntag miabot sa RHS-7 si Penafiel nga nakasibilyan ug duna’y gikuyogan nga usa ka lalaki nga gustong mokuha og neuropsychological examination.
Nakabantay si Combras nga dunay gitakin nga pistola sa kilid si Penafiel iya kini nga giingnan nga i-deposito kini kung gusto kini mosulod, apan giingong mitubag si Penafiel nga dili lang sila magdugay maong gipasulod na lang.
Apan pasado alas-11 sa buntag subling nagkita sa maong buhatan ang duruha ug gipangutana kini ni Combras kun usa ba kini ka polis, apan nagdumili sa pagtubag si Penafiel ug si Combras mipasabot nga siya maoy examiner sa maong buhatan.
“Ingon siya, nganong mangutana man ka? Mao to nagkalalis na me,” matud pa ni Combras.
Matud pa nga gipasabot ni Combras si Penafiel nga respetuhon ilang buhatan sama ra usab kun silang mga taga RHS-7 mobisita sa buhatan sa unit ni Penafiel. Apan nagkainitay og tinubagay nga miresulta sa diriyot nilang pagsinukmagay hangtud nga gitambagan si Penafiel nga mobiya na lang sa lugar. Apan gikatahong mibahad si Penafiel sa pag-ingon: “bantay ka nako magkita ra ‘ta sa gawas.”
“Wala ra’y physical contact sir, misunderstanding ra ‘to, nagpa- blotter lang ko kay dili man maayo ‘tong hulga niya,” sigun pa ni Combras nga nahinabi sa Mabolo Police. Gipasabot ‘sab ni Combras nga wala na ‘sab kini plano nga mopasaka og kasong administratiba batok ni Penafiel. Ang Banat News misulay og kuha og pamahayag ni Penafiel apan kini pakyas nga makuha ang iyang komento. – /EIM) (BANAT NEWS)