CEBU, Philippines – Walay nakitang sayop ug gidayeg pa sa hepe sa Provincial Intelligence Branch sa Cebu Provincial Police Office (CPPO) ang gihimo sa kapulisan sa lungsod sa Tuburan pagpusil sa usa ka drug suspect nga mipabuto og granada dihang ilaha untang dakpon.
Si Superintendent Rodolfo Albotra ang hepe sa PIB nga nahinabi sa mga tigbalita miingon husto ang gibuhat sa mga polis tungod kay sila may nabutang sa peligro sa gibuhat sa suspek nga si Jonald “Empoy” Calaunan, 25.
Gipasabot ni Albotra nga base sa nanglabay nga mga operasyon, kursonada nang makigpatay ang mga drug suspects karong mga panahona. Sigun pa niya nga gikinahanglan nga dili magpanuko og depensa ang kapulisan tungod kay igo lang sila mihimo sa ilang trabaho ug dili sila buot nga dunay laing mapagan.
Si Calaunan, usa ka notadong drug pusher sa maong lungsod ug nabutang sa “watch list” sa CPPO.
Atol sa hitabo, naangol si Calaunan human kini gipusil sa usa ka polis dihang giibot niini ang granada dihang dakpon na kini, apan tungod sa pagkaigo niya sa dapidapi nabuhian niini ang granada nga naibtan na og pin hinungdan nga mibuto.
Naangol ang usa ka sibilyan nga si Jiosias Jugan human kini naigo sa shrapnel sa iyang liog. Nakuha sa kapulisan ang ubay-ubay nga putos sa drugas nga mikantidad og P75 mil, lakip ang usa ka gamay nga putos sa drugas nga mao’y gipalit sa asset sa kapulisan. – /EIM) (BANAT NEWS)