CEBU, Philippines - Gidasig sa Philippine Postal Corporation (Philpost) ang tinun-an sa high school ug elementarya nga mosuwat ngadto sa Santo Papa nga si Pope Francis sa pagbisita niini sa nasud karong Enero.
Si Nathaniel Guingguing, postmaster sa Philpost-7 miingon nga ang mga suwat libre nga ilang dawaton sa pagpadala ngadto sa kauluhan.
Ang suwat kinahanglan nga Ininglis ug dili molabaw sa usa ka pahina ang gitas-on ug kinahanglan usab nga kinamot o handwritten ug pirmahan sa nagpadala nga tinun-an.
Usa ka komitiba ang mohagpat sa labing maayong suwat nga maoy itunol ngadto kang Pope Francis.
Gipaabot nga basahon sa Santo Papa ang mapili nga labing maayong pagkahan-ay nga sulat atol sa iyang homily sa misa.
Ang unod sa suwat maglakip sa pag-ampo sa kalinaw sa nasud, pasalamat, pangayo sa iyang panalangin ug uban pa.
Si Guingguing miingon nga hangtud lang Disyembre 5 ang ilang pagdawat sa mga suwat sa mga tinun-an. (BANAT NEWS)