CEBU, Philippines - Nagtingkagol sa prisohan ang usa ka lalaki human nakuhaan og shabu sulod sa Toledo City Hospital.
Giila ang dinakpan nga si Ronald Alan Cabatuan, 31-anyos, taga barangay Poblacion, dakbayan sa Toledo. Matud sa kapolisan nga unang nagkalalis ang suspek ug ang kapuyo nga si Nanny Navarro, 30-anyos, sa ilang panimalay.
Nisangpot sa pagkuha og hinagiban ang maong panaglalis hinungdan nga nasamad ang kapuyo sa suspek sa wala nga kamot. Ang suspek ra usab ang nidala sa iyang kapuyo sa tambalanan.
Girespondehan sa kapolisan ang insidente ug sa dihang girekisa ang suspek, maoy nakuha ang usa ka gamay nga putos nga gituohang shabu.
Gikatakdang pasakaan og kaso ang dinakpan. (BANAT NEWS)