CEBU, Philippines - Gilibot sa mga opisyal sa kapulisan kagahapon sa buntag ang mga nag- unang sam-ang , terminal ug pantalan dinhi sa Sugbo aron pagsusi sa pagpangandam sa seguridad tungod sa pagsaulog sa adlaw sa mga patay ug mga santos.
Si Police Regional Office -7 director Prudencio “Tom” Bañas misubay sa Cebu South Bus Terminal, gisunod ang Calamba ug Carreta Cemetery ug gisubay ang Pier 1.
Ang hepe sa Police Community Relations (PCR) sa Cebu City Police nga si Chief Insp. Enrique Belciña nanghatag ‘sab og mga anti-criminality flyers sa mga tawo.
Subli nga gipahinumduman sa kapulisan ang katawhan nga likayan ang pagdala og mga mahalon nga gamit aron dili matintal ang mga badlongon.
Gipahugtan na ‘sab ang seguridad sa North Bus Terminal ug Cebu South Bus Terminal ug gidugangan na og 22 ka mga polis sa Mandaue City Police Office aron motabang sa mga blue guards sa terminal.
Gitug-an ni Zosimo Jumao-as ang manager sa NBT nga adunay K9 units ug mga sakop sa PDEA-7 ang mohimo og mga inspeksyon.
Niadtong Miyerkules nipahigayon ang LTO-7 og random drug test sa mga bus drivers, hinoon walay nagpositibo kanila.
Mamahimo usab mokuha og special permit sa lamesa sa LTFRB-7 sud sa terminal niadtong buot molabyog og rota.
Susamang sitwasyon gihapon ang gipatuman diha sa CSBT nga gidugangan ang mga gwardiya ug polis gikan sa Cebu Provincial Police Office.
Lakip sa gidugang ang mga bus ug minibuses tungod sa nakitang posibleng pagkuwang niini sugod karong adlawa.
Samtang sa dakbayan sa Toledo, gipahugtan usab ang mga pantalan ug terminal niini tipik sa gipatuman nga Oplan Kaluluwa 2014 sa Philippine National Police (PNP) lukop nasud.
Samtang sa Talisay City, gipahibalo ni Supt. Reycel Carmelo Dayon nga gisugdan na nila ang pagpatuman sa hugot nga seguridad sa mga sam-ang ug pangpublikong lugar. (Jojo C. Ugdol, Decemay Padilla, Raymond Abarcas ug Romeo Limpangog/EIM)