CEBU, Philippines - Nabalhog sa detention cell sa Consolacion Police Station ang usa ka usher sa masiao nga suwertres human usa ka polis ang iyang gibaligyaan sa barangay Jugan ala una pasado sa hapon niadtong Miyerkules.
Si PO1 Robert Escobia sa Consolacion Police Station miila sa nadakpan nga si Rosalito Vilar Aniñon, 36, taga lungsod sa Liloan apan nang-isyu og suwertres nga masiao sa barangay Jugan, Consolacion.
Matud ni Escobia nga wala gyud siya nasayod sa ilegal nga kalihukan sa maong suspek sa maong dapit ug nahidangat siya sa maong lugar sa lain nga katuyuan.
Dugang pa niya nga sa iyang paglabay sa tugkaran sa usa ka panimalay, maoy iyang nalabyan ang usa ka tawo nga naglingkod nga nagsuwat ug nagtan-aw usab niini ang laing tawo nga nagbarug.
Si Escobia miingon nga miyanghag sa pagtan-aw kaniya ang nagsuwat nga lalaki ug nagpahiyom nga mihagad kaniya sa pagpa-isyu og numero sa suwertres kay kun modaug daku pa ang dibidindo nga madawat itandi sa lotto outlet. Iyang giduol si Aniñon nga naglingkod ug ang lalaki nga nagbarug nga nakaila kaniya ang nikaratil og dagan pahilayo sa maong lugar.
Modagan unta si Aniñon apan nagunitan ni Escobia uban ang pagpaila nga polis ug dihang iyang nakita ang mga tally sheets, tipsheet nga adunay gisuwat nga numero sa suwertres ug P200 nga salapi dali kini niyang gipusasan. Si Escobia miingon nga kasong kalapasan sa Republic Act 9287 o Anti-Gambling Act ang kasamtangan karong giandam batok sa dinakpan. (BANAT NEWS)