CEBU, Philippines – Gipusil patay ang usa ka lalaki sa riding-in-tandem samtang nangita og internet café sa barangay Poblacion, dakbayan sa Lapu-Lapu niadtong Lunes sa gabii. Si Ronnie Pulvera, 39, taga Punta Rizal sa maong lugar ang gipusil sa eskina sa G.Y Dela Cerna ug Osmeña Street atubangan sa Rose Pharmacy.
Matud ni PO2 Joseph Cutanda, imbestigador sa Lapu-Lapu City Police Office-Homicide section, nga samtang naglakaw ang biktima kuyog ang iyang mga pag-umangkon, kalit nisugat kanila ang duha ka tawong sakay sa usa ka motorsiklo samtang nagsul-ob og full-faced helmet ug wala’y plate number.
Nihunong ang duha ka riding-in-tandem ug gipusil sa makadaghang higayun si Pulvera.
Nakaangkon og samad pinusilan si Pulvera sa tuo nga bahin sa lawas, sa walang dughan ug samad sa likod nga bahin sa iyang ulo hinungdan sa iyang kamatayon.
Usa ka sidewalk vendor nga si Marciano Oray ang hapit maigo sa stray bullet ug narekober sa kapolisan ang usa ka deformed shell sa iyang cigarette box. Dugang ni Cutanda nga laing duha ka deformed nga bala ug empty shells ang nakuha sa crime scene gikan sa usa ka caliber .45 ammunition. – /GMR) (BANAT NEWS)