CEBU, Philippines - Gipahigayun kagahapon ang Santos nga Misa sa Basilica Minore del Santo Niño paghinumdum sa kusog nga linog usa na ka tuig ang nakalabay diin ang simbahan ang usa sa naapektohan.
Matud ni Fr. Jonas Mejares nga ang linog usa ka wake-up call sa katawhan nga ang labing importante sa kalibutan mao ang eternal life.
Sigon niya nga angay na’ng i-upgrade ang pagtuo sa katawhan sa Ginoo tungod kay mao lang kini ang makaluwas sa kalisud, kalamidad ug problema. Mihatag sab og espesyal nga pag-ampo alang sa mga nabiktima sa linog sa Sugbo ug Bohol.
“Ang pangutana nganong gitugot man sa Ginoo nga mahitabo kini? Pangutana nga lisud tubagon. Mihana kita pagtubag pero hangtud karon wala’y kahingpitan ang maong tubag,” matud niya. Matud ni Mejares nga grabe ang pagsuway nga nasinati sa miaging tuig ilabi na sa pag-abot sa kinakusgan nga bagyo.
Gitapos ni Mejares ang iyang homily sa pagkanta sa “You’ll Never Walk Alone”.
Matud niya nga ang maong kanta haum sa panahon karon aron malamdagan ang katawhan nga wala kita mag-inusara tungod anaa ang Ginoo, anaa si Senior Santo Niño.
Sa Bohol diin sentro sa linog gipahigayun usab ang Santos nga Misa, bagting sa kampana ug pagbutang sa marker.
Nanghinaut ang mga Bol-anon nga lakip sa bisitahon sa Santo Papa ang ilang dapit nga nakaangkon og grabeng kadaut tungod sa linog. (BANAT NEWS)