CEBU, Philippines - Nasikop sa kapolisan sa Minglanilla Police kagahapon sa hapon ang usa ka lalaki nga usa sa gitudlo nga mga suspek sa pagpangrakrak sa Barangay Vito sa lungsod sa Minglanilla niadtong Miyerkules sa kaadlawon. Ang nasikop naila nga si Cristito España, 36, nagpuyo sa maong dapit samtang nakaikyas ang iyang kauban nga si Armando Orillano.
Ang Provincial Director sa Cebu Provincial Police Office nga si Senior Superintendent Noel Gillamac nahinabi sa Banat News miingon nga dunay mireklamong dunay nagpabuto og armas sa maong dapit. Dihang miresponde ang mga polis, ilang nakit-an si Orillano nga misutoy og dagan, apan ilang naapsan si España hinungdan sa iyang pagkasikop. Narekober gikan kaniya ang usa ka kalibre 45 nga pistola nga may upat ka bala, usa ka .30 caliber Carbine Rifle nga may pito ka bala.
Matud pa ni Gillamac nga ang tag-iya sa pistola mao si Orillano ug narehistro kini sa iyang ngalan base sa ilang pagsusi sa Camp Crame. Siya ‘sab ang usa sa mga suspek sa pagpangrakrak sa maong lugar nga miangol sa duha ka mga lalaki. Matud pa ni Gillamac nga ilang pasakaan og kaso si Orillano ug ipakanselar ang iyang lisensiya, samtang kasohan usab si España. (BANAT NEWS)