CEBU, Philippines - Ang Super Typhoon Ompong (international name Vongfong), gihulagway nga labing kusog nga bagyo nga misulod sa Philippine Area of Responsibility (PAR) karong tuiga apan mipasalig ang weather bureau sa nasud nga dili kini direktang makaapektar sa Pilipinas.
Ang Philippine Atmospheric, Geophysical and Astronomical Services Administration (PAGASA) miingon nga ang mata sa maong bagyo naa sa usa ka libo ka kilometros sa silangang bahin sa Tuguegarao City.
Gipaabot kini nga hinay nga moirog padulong sa amihanang kasadpan siyam ka kilometro matag takna.
Matud pa sa PAGASA nga layo ra kaayo si Ompong sa nasud. Ang bagyong Ompong dili motugdon sa bisan asang lugar sa nasud ug may dala kini nga hangin nga may gikusgon 215 kilometro sa iyang mata.
Karong tuiga lang ikatulo na si Ompong sa kusog nga bagyo nga misulod sa PAR una niini ang bagyong Glenda ug Neneng. (BANAT NEWS)